رواية عودة نيروز
للكاتبة زينب محروس
الفصل الرابع
على الطرف التاني.
ظهرت ملك في شقة هلكانة في حي قديم، حتى مكنتش مهتمة بنضافة المكان حواليها، اتحركت عشان تفتح الباب فظهرت شذى اللي قالت بضيق:
_ طالبة تشوفيني ليه؟؟؟
ابتسمت لها ملك بخبث وقالت:
_ اخبارك انقطعت عني، قولت اجيبك وأسألك بنفسي.
وزي ما قال أنس عنها خبيثة، فهي طلعت خبيثة فعلاً بل قد تكون مريضة نفسيًا، لأن من خلال كلامها مع شذى اتضح إنها بتحاول تنتقم من أنس ونيروز عن طريق إنها تكسر قلب أنس وتخليه يتعرض للأذى والخذلان من نيروز البنت الوحيدة اللي حبها في حياته.
ولما استفسرت شذى منها عن سبب الكره اللي عندها واختفائها من حياتهم، ردت عليها ملك إنها عاشت عمرها كله بتكره نيروز ولما قربت منها كان بغرض معرفة كل حاجة عن حياتها عشان تعمل زيها وتبقى أفضل منها كمان، وعشان كدا كانت دايمًا بتمثل الطيبة والحب على نيروز، حتى لما سافرت أمريكا هددت ملك أهلها إنهم لو مسمحوش لها تسافر وتكمل دراستها برا مع نيروز هتنهي حياتها، وأجبرت أهلها يعملوا جمعيات ويستلفوا فلوس من معارفهم عشان هي تسافر بالرغم من علمها إن أهلها دخلهم المادي أقل من المتوسط بكتير وبيكافحوا عشان يعيشوا لكنها تغاضت عن الموضوع عشان متبقاش نيروز أفضل منها.
ولما رجعت زيارة لأهلها كان والدها توفى وعرفت ملك إن أنس فاقد الذاكرة وعشان كدا استغلت الفرصة عشان تكسر قلب نيروز، فكذبت على أنس إنهم كانوا بيحبوا بعض وهو كان واعدها لما ترجع من السفر هيتجوزوا، وبدأت تختلق مواقف تظهرها لطيفة قدام أنس اللي استجاب لخداعها وبالفعل اتجوزها، وطلبت ملك من نيروز متحضرش الفرح لأن أنس مش حابب يشوفها.
وبعد الزواج بفترة بسيطة رجعت لأنس الذاكرة واكتشفت إنه ارتكب أكبر غلط في حياته لما تزوج من ملك!! ومع ذلك كان بيحترمها على قد ما يقدر لكن غصب عنه كان بيبعد عنها عاطفيًا، وأول ما حست ملك بتغيره بدأت تظهر شخصيتها العصبية الغيورة لدرجة إنها كانت بتتخانق معاه على اتفه الأسباب وتتهمه إنه بيبعد عنها عشان بيحب غيرها ومقدرش أنس إنه يسكت على أسلوبها الهمجي واتهمها إنها كذبت عليه وخدعته عشان يتجوزها وهي أكتر واحدة عارفة المشاعر اللي بينه وبين نيروز، فكان لازم تقطع أي نية عنده بالتواصل مع نيروز فقالت له إن نيروز أصلا اتخطبت بمجرد سفرها لأمريكا وإنها مبقتش تحبه ولا عايزة تشوفه تاني وعشان كدا هي قررت إنها تعوضه وتعطيه كل حبها وحياته.
لكن أنس مهتمش بمشاعر ملك وقرر يطلقها، ومن هنا تزايد الحقد في قلب ملك وقررت تنتقم منهم الاتنين وتوقع بينهم وعشان كدا طلبت مساعدة شذى اللي كانت زميلة مقربة من أنس وبسببه اتعرفت عليها ملك.
طلبت ملك من شذى إنها تزود قلق نيروز على ملك، وتزرع جواها الشك تجاه أنس ومتسمحش أبدًا إن العلاقة بينهم تكون كويسة، وعلى قد ما تقدر تستعجل في إتمام الخطة لأنها مش هتقدر تعيش مختفية كدا لفترة أطول ولازم ترجع تمارس حياتها بشكل طبيعي بعد ما تخلي نيروز تدمر بإيدها حياتها وحياة أنس العاطفية.
★★★★★★
قفلت نيروز دفتر ملك بعد ما قرأته مرات متتالية وفي كل مرة بتحاول تثبت لنفسها إن أنس بريء وعمره ماكان شخص سادي، لكن الكلام اللي كتبته ملك مكنش بيتغير، لحد ما طرح عقلها سؤال قد يكون الحد الفاصل في اتهام ملك لطليقها، وهو إن التفاصيل المادية اللي ذكرتها ملك بخصوص زواجها من أنس صعب تكون حقيقية لأن أنس مجرد مدير حسابات في شركة ومهمًا كان مرتاح ماديًا فهو عمره ما يقدر ينفذ موضوع شهر العسل اللي كان في باريس، بس في حل واحد عشان السفر لباريس يكون واقعي، لما يكون أنس بيختلس فلوس من خزنة الشركة!!!
بس موضوع الاختلاس دا مستبعد لأنها اشتغلت معاه وشافت قد ايه هو شخص أمين!!! دا غير إن موجود مدير مالي بيراجع وراه!!
جميع حقوق النشر محفوظة للكاتبة زينب محروس ولمدونة الويشي
عشان تنهي التساؤلات اللي عندها كان لازم تقرب من أهل أنس وبالفعل بدأت تزورهم يوم ورا يوم وعلى قد ما تقدر كانت بتحاول تفتح مواضيع قريبة من من جواز أنس لكن أمه مكنتش بتتكلم عن جوازه نهائي، وفي يوم كانت قاعدة مهمومة ولما سألتها نيروز عن سبب شرودها، عرفت منها إن أنس باع الشقة اللي كان شاريها لنفسه عشان يدفع تكملة الحساب لشقة أشرف اللي هيتجوز فيها وبالباقى من الفلوس دفع قسط عربيته.
وذكرت والدته إنه من لما طلق وهو رافض يتجوز ودا بيقلقها عليه، فاستغربت نيروز إن ملك مذكرتش موضوع الطلاق!!! فبدأت تسأل عن تفاصيل اكتر وعرفت إنهم مطلعوش شهر عسل من الأساس بسبب شغل أنس.
ولذلك قررت نيروز إنها تمشي ورا مشاعرها وتصدق كلام خالتها إن ملك ممكن تكون كويسة وهي اللي بتعمل كدا قصدًا.
عرفت نيروز من والدة أنس إنه بيلعب كورة مع في النادي اللي في الحارة اللي وراهم، فراحت له هناك عشان تتكلم معاه.
قعدت تتفرج عليه في صمت وقد ايه بقى محترف في لعب الكورة وبقى يسجل أهداف عكس أيام الطفولة، وهو شافها لكنه تجاهل وجودها لأن النادي كدا كدا مختلط وموجود بنات غيرها.
أخدت إزازة ميه وجريت عليه تهنيه بالفوز، فشكرها ورفض يشرب من الميه اللي معاها مع إنه كان عطشان جدًا.
خرج من النادي وهي وراه، فوقف وقال بزهق:
_ هو في ايه!! احنا هنا مش في أمريكا وأكيد هنتفهم غلط!!
ردت عليه نيروز بمشاكسة:
_ أو يمكن هنتفهم صح!؟
رد عليها بضيق مصطنع:
_ والله لو هيفهموا إني مش طايقك يبقى كويس.
اتنهدت نيروز وقالت بترقب:
_ طيب بعد إذن الأستاذ اللي مش طايقني يعرفني هو مش طايقني ليه؟
سكت لثواني قبل ما يقول بحيرة:
_ بصي هو مش حكاية مش طايقك، بس الفكرة إنك طلبتي مني مبقاش موجود معاكي واخلفتي الوعد اللي قطعناه لبعض، فإيه سبب رجوعك دلوقت؟!!
جميع حقوق النشر محفوظة للكاتبة لمدونة الويشي
شاورت نيروز على نفسها بصدمة وانكرت كلامه، فبدأ يحكي لها اللي حصل معاه من أول الحادث اللي اتعرض له هو وأخته وبسببه اتكسرت تليفوناتهم وهو فقد الذاكرة لأكتر من خمس سنين ، ولما رجعت له الذاكرة لقى نفسه متجوز ملك ، وعرف منها إن نيروز مرتبطة.
أخدته نيروز معاها لشقة أهلها وسلمته الدفتر بتاع ملك وبعد ما قرأه سألها بهدوء:
_ مش فاهم بردو دا ايه؟
_ مش انت الشخص المقصود في المذكرات؟
رد عليها بسخرية وقال:
_ مش معنى إنه مكتوب أنس يبقى أنا المقصود، وبعدين عرض جواز ايه اللي هعمله على البحر! أنا أصلا اتجوزتها عشان هي قالت أننا كنا مرتبطين ومحبتش اطلع قليل الأصل ومش قد كلمتي، غير كدا مكنتش هعبرها حتى وأنا فاقد الذاكرة.
ابتسمت نيروز بفرحة وقالت:
_ طب الحمدلله، طمنتني.
بدأت تحكي له عن شذى وإن هي اللي وصلت الدفتر لنيروز في امريكا وعن سبب رجوعها مصر، فعاتبها أنس عشان صدقت الكلام اللي اتقال عنه ومحاولتش تسأله، فردت عليه نيروز بعتاب مماثل:
_ طب ما انت كمان صدقت كلام ملك عني وقطعت التواصل معايا.
_ بس أنا صدقتها عشان إحنا فعلاً مكناش على تواصل فقولت عادي ممكن ارتبطي، لكن لما تبقى اكتر واحدة عارفة شخصيتي وتصدقي شوية حبر على الورق يبقى من حقي ازعل.
طبطبت نيروز على كتفه وقالت بحرج:
_ خلاص أنا آسفة حقك عليا متزعلش.
بصلها أنس بضيق وقال باستنكار:
_ حقك عليا ايه هو انتي بتراضي ابن اختك؟ دا انتي غريبة!!!
سابها ورجع شقته، وهي فضلت ساكنة مكانها ومستغربة من كلامه، أصل المفروض تصالحه ازاي يعني؟ مش الناس بتعتذر في الصلح ويبقى كدا تمام ولا ايه!!!
يتبع........
بقلم زينب محروس
لقراءة الفصل التالي: اضغط هنا
جميع حقوق النشر محفوظة للكاتبة زينب محروس ولمدونة الويشي